Juletid i fangsthytta – Halvmåneøya 1947

Det går mot mørketid på Halvmåneøya. Sola er alt godt under horisonten, og dagane er berre som ei lang skumring. Snart er det heilt mørkt heile døgnet. Men dei fire fangstmennene frå fjelltraktene i Sør-Norge let seg ikkje affisere av dette. Dei går i det daglege arbeidet, og har alt lagt ned over 40 bjørnar. Innan nyttår skal talet bli 45.

Året er 1947, og det er snart fire månader sidan dei kom i land på øya. Turen har vore planlagt i over to år, men det var berre éin av dei som fekk sjansen året før. Men no er dei her, alle fire.

Det har vore mykje uvær denne hausten. Mange dagar har dei måtta halde seg inne og har ikkje kome ut på fangstfeltet. Halvmåneøya er vêrhard. Ei flat lita steinrøys ut mot storhavet, der stormen verkeleg får tak. Kaldt er det også. Under 25 kuldegrader dei fleste dagane i desember.