Skal det humpa og gå, eller skal Svalbard skine?

Mjukt hadde tåka pakka Longyearbyen inn før bursdagsfesten. Den rann nedover dei fuktige fjellsidene då 100-årsmarkeringa starta.

Gjestene var symboltunge. Kronprinsen, statsministeren og justisministeren såg splittflagget på Skjæringa bli heist – som for 100 år sidan. Svalbard har vore ein del av kongeriket Noreg i 100 år. Ein annleis og viktig del.

Det er symboltungt at både kongeparet, kronprinsparet, statsminister og justisminister var til stades under jubileumssymposiet Oslo i mai. At kongeparet besøkte Svalbard i juni, at kongen trassa dårleg vêr og kom seg i land på Bjørnøya for første gong – godt hjelpt av ein traktor med hengar. Og at denne veka var kongehuset og regjeringa tungt representert i Longyearbyen igjen.

Statsministeren og justisministeren prioriterte Svalbard midt i ein travel valkamp. Støre hadde, slik det høver seg, med ei gåve til Longyearbyen. 35 millionar kroner fordelt på straumstøtte, Sysselmeisteren og Longyearbyen lokalstyre. Me kan takke pent og smile, men det er berre småpengar samanlikna med det som trengs.

Kva no, Jonas? spurde gruveklubbleiaren etter markeringa ved minnesmerket over dei som har mista livet i norsk gruvedrifts teneste.

For 100 år sidan var gruvearbeidarane viktige for å få i stand flagg, stang og fest. No ryddar dei bort arbeidsplassen sin. Gruveyrket er utdatert. Det same er infrastrukturen som gruvebyen Longyearbyen er bygd på. Kulturminne, bygg som fortel historia om det norske Svalbard, held på å rase saman grunna manglande vedlikehald.

Dagens bustader, energi, drikkevatn, rør og rullebane treng fornying - raskt.

Styresmaktene i Oslo avgjer om Svalbard framover skal skinne mot verda – eller berre humpe og gå.

Longyearbyen skal vera eit attraktivt familiesamfunn for nordmenn. No går mykje i motsett retning. I tillegg til å vera ein dyr plass å bu (for dei som ikkje har statsløn, gratis bustad og bil), kuttar Longyearbyen lokalstyre i bulyst-tiltak for å spara pengar.

Først vart symjebassenget stengt ein dag i veka. Frå i haust skal det vera stengt for offentleg bading i to, melder Longyearbyen lokalstyre denne veka.

Og vil ikkje-norske familiar miste barnetrygd?

«Its complicated» song Fiona Lucille Carubanga (9) til kronprins, ministrar og byråkratar på torget i Longyearbyen.

Under festforestillinga i kulturhuset fortalde konferansier Eivind Oldernes Hoem at det er viktig for ungdommane at vidaregåandetilbodet vil fortsette, og at byen får behalde den gode kulturskulen. Også dette er kritisk infrastruktur.

Kva betyr Svalbard når valkampen startar og dei store rollene skal fordelast? Det er ikkje mange stemmer å hente lokalt i ein så liten befolkning. Vil me likevel bli prioritert når den neste regjeringa er satt? Kva skal nivået på Longyearbyen vera?

Svalbardtraktaten trådde i kraft 14. august for 100 år sidan. Han slår fast at Svalbard er Norsk, men sikrar også borgarar og selskap frå signaturlanda adgang til øygruppa.

Då splittflagget vart heist på Skjæringa torsdag, låg det russiske fartøyet «Professor Molchanov» på Adventfjorden. Det gjorde også den norske kystvakta med paradeflagg. Generaldirektør Ildar Neverov i russiskstatlege Trust Arktikugol og representantar frå den russiskortodokse kyrkja var på Skjæringa og fekk med seg markeringa. Neverov tok høfleg assisterande sysselmester Katharina Rise i handa, medan russiske styresmakter trykte på repeat-knappen. Dei publiserte nok ein gong ei skulding om at Noreg militariserer Svalbard. Dette blir avvist av Noreg på vanleg måte. 

Trump møter Putin i Alaska.

Kva no? spør me.

Truleg får me ikkje svar, men må lage vår eigen veg – innanfor rammene styresmaktene gir. Me får håpe og be om at dei blir sterke og romslege, sjølv om folk i Longyearbyen er over middels gode på brannslokking og kreative løysingar.

Så må alle gjere sitt beste for å ta med det viktigaste vidare inn i transformasjonen: samhaldet, åpenheita, kreativiteten og gleda over å bu i Longyearbyen.

Sjølv om byen og infrastrukturen skranglar, gjer ikkje byens befolkning det. 100-årsarrangementet viste krafta i Longyearbyen. Tenk alt det er mogeleg å få til med i overkant av 2.500 innbyggjarar midt i ferietida!

Vel blåst til Longyearbyen – no er det Oslo sin tur til å levere.